په کابل پوهنتون کې د اسلامي شبکه کاري او معرق کاري هنري نندارتون جوړ شو

په کابل پوهنتون کې د اسلامي شبکه کاري او معرق کاري هنري شبکې ۴۱ با ارزښته اثارو نندارتون وګړو ته د ورپېژندنې په موخه د یوې غونډې په لړ کې معرفي شو. دا غونډه د روان کال د وږي میاشتې په ۳ نېټه د لوړو زده کړو وزارت سرپرست، د کابل پوهنتون رییس، په لوړو زده کړو چارو کې د ولسمشر سلاکار وزیر، د اطلاعاتو او کلتور وزارت مرستیال، د افغان فلم رییسې، د کابل ښاروالي د شپږمې ناحیې رییس، د ښکلو هنرونو پوهنځي رییس، د دې پوهنتون استادانو او محصلینو په ګډون د کابل پوهنتون د ښکلو هنرونو پوهنځي د دکتور عنایت الله شهراني په تالار کې پرانیستل شو.

د ښکلو هنرونو پوهنځي رییس پوهنمل سمیع الله نبي پور د دې غونډې ټولو ګډونوالو ته ښه راغلاست او د دې برنامې ټولو همکارانو د ستاینې ترڅنګ یې د ښکلو هنرونو پوهنځي په موخو او پالیسي، د افغانستان په اسلامي ټولنه کې د هنر لپاره د زمینې برابرول او د هنر، ټولنې او مذهب تر منځ د یو هر اړخیز تعامل رامنځته کول، اسلامي هنري ارزښتونه او په اسلامي تمدن کې د هنر رول په اړه یې خبرې وکړې او دا ډول برنامې یې یادو موخو ته په رسېدو کې اغېزمنې او ګټورې وګڼلې.

وروسته د کابل پوهنتون رییس محمد عثمان بابري د دې نندارتون جوړوونکو څخه د مننې ترڅنګ «د ټولنې په لوري د پوهنتونونو کړنو د بدلون اړتیا او د خلکو او هیواد اړتیاوې» او د «کلتوري ازادیو» څخه د معلوماتو نه درلودل د «ابتذال» په لوري د ټولنې تللو باندې خبرې وکړې او د دې معظل په لرې کولو او د هنر او کلتور ترمنځ د اړیکې په معقول توب کې یې د اړوندو برخو مسوولینو په ځانګړې توګه د اکاډمیک قشر هدفمندو هڅو ته دقت او پاملرنه ګټوره او اړینه وبلله.

پدې غونډه کې د لوړو زده کړو وزارت علمي مرستیال او سرپرست پوهنمل عبدالتواب بالاکرزي خبرې وکړې او ویې ویل، چې ټول اسلامي اثار، چې له پخوانیو څخه مونږه ته پاتې دي او اوس تر سترګو کیږي په نقشونو ښکلي شوي او ښکلي هنري اغېزې لري، چې دا د متخصصو هنرمندانو د  مهارتونو د ژور عشق او احساس او د هنر- ټولنې او دین د نژدې اړیکې ښوونه کوي او د دې اړيکې په زیاتې پیاړتیا یې تاکید وکړ.

د اطلاعاتو او کلتور وزارت مالي او اداري مرستیالې او د کابل پوهنتون استادې پوهنیارې مژګان مصطفوي دا نندارتون مبارک یاد کړ او ویې ویل، چې د هرې ټولنې شته د هغې ټولنې د کلتور او کلتوري ارزښتونو مدیون وباله، شبکه کاري او معرق کاري یې د افغانستان د اسلامي ټولنې د غني هنر او کلتور له برخو څخه وشمېرل. مېرمن مصطفوي په فرهنګي او د فرهنګ او هنري-فرهنګي ارزښتونو بېرته راژوندي کولو په موخه په ودانیو او اباديو کې د معرق کاري هنر او نقش ویستل مهم او د اطلاعاتو او کلتور وزارت او ښکلو هنرونو پوهنځي ترمنځ د هر اړخیزو همکاریو او ټینګو اړیکو په رامنځته کولو یې تاکید وکړ.

د دې نندارتون په پای کې د ښکلو هنرونو هغو ۱۵ تنو ته، چې د دې اثارو په پنځونه کې رول درلود، د هغوی همکار استادان او د پیمان پروډکشن رییس ښاغلي سید مجیب الدین، چې د دې نندارتون مالي همکار وو ستاینلیکونه ورکړل شول او وروسته د دې غونډې ګډون کوونکو د نندارتون په سیمه کې، چې د ښکلو هنرونو پوهنځي په شنه سیمه کې جوړه شوې وه، د اسلامي شبکه کاري او معرق کاري له ۴۱ ارزښتمنده اثارو څخه لیدنه وکړه.