د 1400 کال د کابل حوزي د کانکور ازموینې اخیستو بهیر په کابل پوهنتون کې پیل شو
د کابل حوزې د ۱۴۰۰ کال د کانکور ازموینې اخیستو بهیر د روان کال د زمري په ۱۴ نېټه د پنجشنبې په ورځ د لوړو زده کړو وزیر ډاکټر عباس بصیر، د کابل پوهنتون رییس پوهاند دکتور محمد عثمان بابري د ازموینو د ملي ادارې رییس پوهاند عبدالقدیر خموش په حضور په کابل پوهنتون کې پیل شو.
د لوړو زده کړو وزیر داکتر عباس بصیر، د کابل پوهنتون رییس پوهاند دکتور محمد عثمان بابري او د ازموینو ملي ادارې رییس پوهاند عبدالقدیر خموش هر یو د کانکور ازموینو د عدالت په تامین تاکید وکړ او ویې ویل، چې د کانکور ازموینه په داسې شکل طراحي او عیاره شوې، چې هېڅ ډول جعل، تقلب او تزویر نشي کولای په هغه کې نفوذ وکړي او داوطلبان د له دې اړخه په پوره ډول ډاډه واوسي او د کامیابي یواځينۍ معیار به د داوطلبانو استعداد، وړتیا او توانايي ده.
د کابل حوزې ازموینه په څلورو دورو کې اخیستل کیږي، لومړۍ او دوهمه دوره یې د پنجشنبې (د زمري په ۱۴) او درېمه او څلورمه یې دوره یې د جمعې په ورځ د (زمري په ۱۵) نېټه د کابل په ټولو دولتي پوهنتونونو کې اخیستل کیږي او د ازموینو ملي ادارې رییس پوهاند عبدالقدیر خموش په وینا تر ۵۸ زرو څخه زیات داوطلبان به پدې څلورو دورو کې ګدون وکړي.
د نورو ۳۳ ولایتونو ازموینه پخوا په دوه دورو کې اخیستل شوې. د ازموینو د ملي ادارې رییس پوهاند عبدالقدیر خموش وایې، چې د کانکور پدې ازموینه کې عمومي، دیني علوم او د ۱۴۰۰ کال د شپې پوهنځیو ټول ۲۱۴۹۸۱ تنو ګډون کړی، چې له دې ډلې څخه ۱۳۳۱۸۴ تنه یې هلکان او ۸۱۷۹۷ یې نجوني دي.
