د محصلینو ترمنځ د کابل پوهنتون په لیلیه کې د شعر او همدردي ماښام فرهنګي برنامه جوړه شوه

د شعر شپه فرهنګي برنامه د روان کال د تلې میاشتې په ۱ او ۳ نېټه د سې شنبې او پنج شنبې شپې د کابل پوهنتون رییس، د محصلینو چارو مرستیال، مالي او اداري چارو مرستیال، د پوهنتون لیلیې مسوولینو او په سلګونو محصلو نجو او هلکانو په ګډون د کابل پوهنتون د نجونو او هلکانو په لیلیه کې جوړه شوه.

دا برنامه، چې د محصلینو ترمنځ د همدردي په رامنځته کېدو او پراختیا په موخه جوړه شوې د قران کریم په مبارکو ایاتونو پیل او وروسته د محصلینو له لوري د ښکلو، خوږو او له مفهومه ډک شعرونو په لوستلو، چې هر یو د دې محصلینو د سولې، همدردي او ګډ ژوند کولو په هکله لیکلي وو ادامه پیدا کړه. د کابل پوهنتون رییس پوهاند دکتور محمد عثمان بابري پدې برنامه کې خبرې وکړې او په پیل کې یې د دې فرهنګي برنامې په جوړېدو خوښي وښوده او د دې ډول برنامو جوړېدل یې د همدردي په رامنځته کېدو، پراختیا او ګډ سوله ییز ژوند او د محصلینو په ځانګړي توګه د کابل پوهنتون د لیلیو د محصلینو او د هیواد د ټولو پوهنتون ترمنځ د یوې مناسبې او مطلوبې فضاء په رامنځته کېدو کې ګټور وبلله او د دې فرهنګي برنامې له جوړوونکو او مبتکرینو څخه یې مننه وکړه. پوهاند بابري د خبرو په لړ کې حاضرو محصلینو ته په خطاب کې د یووالي او همدردي په ساتنه، همکاري، نیک فکر او د زده کړیالانو د ټولنیزو ښو اړیکو په برخه کې مسوولانه هڅو باندې تاکید وکړ.

دا برنامه د نورو ډول- ډول فرهنګي برنامو په څېر هر کال د محصلینو او د پوهنتون د لیلیو د مسوولینو له لوري جوړيږي، د کرونا ویروس د قرنتینه دورې وروسته او د حضوري درسونو په پیل او په کابل پوهنتون کې د محصلینو په دوباره حضور سره له سره پیل شوه.